الحمد لله الذي هدانا لهذا وما كنا لنهتدي لولا ان هدانا الله. اشهد ان لا اله الا الله
وحده لاشريك له, وا شهد ان محمدا عبده ورسوله. اللهم صل على نور الأنوار وسر
الأسرار وترياق الأغيار ومفتاح باب اليسار سيدنا محمد المختار واله الأطهار
واصحابه الأخيار عدد نعم الله وإفضاله اما بعد : فيا
أيها المؤمنون... أوصيكم ونفسي بتقوى الله.. فقد فاز المتقون..
قال الله
تعالى : يِا أَيُّهَا الَّذِينَ آمَنُواْ إَن تَتَّقُواْ اللّهَ يَجْعَل لَّكُمْ فُرْقَاناً
وَيُكَفِّرْ عَنكُمْ سَيِّئَاتِكُمْ وَيَغْفِرْ لَكُمْ وَاللّهُ ذُو الْفَضْلِ الْعَظِيمِ -٢٩- الانفال
Hadirin jama’ah Jum’ah ingkang minulyo
Sepindah kulo ngaturaken wasiyat Taqwalloh (Taqwo
dumateng Alloh) ateges nindaake sedoyo perintah Alloh lan nebihi sedoyo
awisanipun. Mugi kanti taqwo meniko kito saged angsal perkawis ingkang sampun
dipun janjiaken Alloh SWT arupi suwargi ingkang kebak kelawan ni’mat saking
Alloh SWT Amin Ya Robbal ‘alamin.
Jama’ah Jum’at ingkang minulyo hafidzokumulloh
Ingkang kawastanan Ibadah inggih puniko nindaake perkawis
kesahenan kangge murih ridhanipun Alloh SWT. Nanging kenyataan wonten dunyo
puniko sekedik sanget saking Ummat Islam ingkang estu
nindaake perkawis meniko kanti tujuan murih ridhanipun Alloh SWT. Sementara katah sanget ugi saking Ummat meniko ingkang dereng saged
ngelahirake Ubuudiyyah wonten awakipun piyambak. Ubuudiyyah inggih puniko sikap
purun ikhlas nerampi punopo ingkang dados putusanipun Alloh SWT dumateng pribadi
ummat meniko. Antaraning Ibadah (ngabekti marang Alloh kanti murih ridhanipun)
kalian Ubuudiyyah (nerampi sedoyo putusanipun Alloh) puniko kedah lumampah
sesarengan wonten sedoyo pribadi kawulanipun Alloh, termasuk kulo panjenengan
sami.
Jama’ah Jum’at ingkang minulyo hafidzokumulloh
Ubuudiyyah meniko sanget erat hubunganipun kalian
kaimanan kulo panjenengan sami kelawan Qodho’ lan Qodaripun Alloh SWT, ingkang
pundi artosipun kulo panjenengan sami wajib nerampi kanti ikhlas pesten utawi
putusan Alloh lan perlakuan Alloh dumateng kulo panjenengan. Kulo panjenengan
wonten Agami Islam puniko kalebet tiyang ingkang Mukallaf, utawi tiyang ingkang
nanggung beban kewajiban2 ingkang kedah dipun lampahi, awit saking wudhu,
sholat 5 wekdal, puoso, zakat, paring nafkah keluargo, tumindak adil, amrih
kesahenan lan sak panunggalipun. Nanging kejawi saking meniko, sejatosipun
sedoyo wau kalebet pembebanan ingkang enteng utawi biasa. Wonten pembebanan2
ingkang sanes, Ingkang akal kulo panjenengan sami wekdal puniko terkadang
dereng saged nerampi, nanging justru wekdal menikolah kito kedah saged taslim
utawi pasrah tunduk keranten sampun dados toto aturanipun Alloh SWT. Kados dene
kito ingkang saweg nandang kesusahan keranten daganganipun kirang pajeng,
tanduranipun mboten panen, rizkinipun kirang lancar, anak turunipun kirang
mranani ing ati lan lintu2nipun. Sedoyo puniko terkadang kirang pas menggahing
akal kulo panjenengan, ingkang pundi padahal kulo panjenengan sampun damel ketaatan
maring Alloh, nanging punopo taseh dipun paringi Alloh kelawan kesusahan kolo
wau.
Jama’ah Jum’at ingkang minulyo hafidzokumulloh
Contoh malih ugi terkadang akal kulo panjenengan
dereng saged nerampi bilih punopo Alloh malah katah paring cubo dumateng ummat
Islam, dumateng papan panggenan ingkang mayoritas Islam, kados dene negari
Palestina ingkang mboten rampung2 nandang cubo perang. Lan ugi mongso rumiyen
ingkang Alloh paring cubo dumateng ummat Islam wonten negeri Mesopotamia/
Baghdad ingkang dados kekejaman bongso Tartar, ngantos dipun criosaken bilih
wekdal puniko Alqur’an sami dipun kalungaken marang Anjing kalean musuh, lan
sedoyo kitab karanganipun Ulama2 Islam dipun buang wonten kali Dajlah utawi
ingkang sakmeniko dipun jenengi sungai Tigris, sahinggo kali tigris puniko
kebak kelawan kitab2 lan mangsi, lan ngantos saged kangge dalanan perang.
Sahinggo crito puniko saged ndadosake setunggal Ulama Mesir, Syaikh Afifuddin
mular lan matur dumateng Alloh: “Ya Alloh, punopo sedoyo puniko saged
kedadosan?? Padahal wonten mriko katah sanget saking poro kawulo alit lan
mboten kagungan duso??” ananging mboten dangu, sawijining dalu Syaikh
Afifuddin meniko ngimpi dipun rawuhi setunggal tiyang ingkang maring kertas,
sakjeroning kertas meniko wonten tulisan ingkang jawab keluh kesahipun Syaikh
Afifuddin meniko :
دع الإعتراض فما
الأمر لك # ولا الحكم في حركات الفلك
ولا تسأل الله عن
فعله # فمن خاض لُجَّةَ البحر هلَكَ
Ninggalo siro ing
ngelawan Alloh, kerono kabeh lumakune alam lan putusan dudu urusan siro
Lan ojo takon siro
ing tumindake Alloh, sopo wonge kang melbu jerone segoro moko bakal rusak
Jama’ah Jum’at ingkang minulyo hafidzokumulloh
Artosipun ing mriki, naliko kulo panjenengan sami
saweg nandang perkawis ingkang mengggahing akal pikiran kito kirang pas, mulo
ingkang kedah kito riyenaken inggih puniko sikap pasrah utawi taslim lan
ambagusi penyono marang Alloh SWT, lan ingkang terpenting maleh cepet
anggenipun kulo panjenengan ngoreksi awak piyambak mbok2 menowo wekdal meniko
kulo panjenengan saweg nglampahi duso marang Alloh SWT. Nanging menawi mboten
saweg nglampahi duso, berarti wekdal meniko Alloh SWT saweg nguji kaimanan kulo
panjenengan sami kanti “cubit sayangipun” Alloh SWT dumateng kulo panjenengan
sami. Sahinggo naliko kulo panjenengan saged berusaha bersikap ingkang kados
mekaten, milo bakal dipun gantos kalian Alloh SWT kanti tambah luhuring derajat
lan kaimanan kito, sahinggo soyo caket marang Alloh SWT. Kulo panjenengan ugi
kedah pitados bilih sedoyo ingkang kito terampi puniko perkawis ingkang paling
bagus saking ngarsanipun Alloh SWT kangge kulo panjenengan.
Jamaah Jum’at ingkang minulyo hafidzokumulloh
Kahanan ingkang kulo panjenengan terampi sakbibaripun
Do’a lan Usaha, meniko sedoyo putusan saking Alloh SWT lan Alloh ingkang
langkung mangertosi kalian putusan meniko. Kewajiban kulo panjenengan sami
inggih puniko, Dungo nyuwun dumateng Alloh banjur Usaha, Tawakkal / Pasrah,
tunduk, iman kanti ambagusi penyono marang Alloh lan ngoreksi ing awak
piyambak.
Wonten Hadis Qudsi Alloh Dawuh :
إن من عبادي من لا
يصلح له إلا الغنى, ولو أفقرته لفسد حاله, و إن من عبادي من لا يصلح له إلا الفقر,
ولو أغنيته لفسد حاله
Saktemene sebagian
songko kawulaKu ono kan ora pantes nyandang kejobo nyandang Sugih, moko
sekirane Aku ndadeake deweke faqir moko deweke bakal sengsoro, lan ugo ono
sebagian songko kawulaKu kang ora pantes nyandang kejobo nyandang Faqir, moko
sekirane Aku ndadeake deweke Sugih, moko deweke bakal sangsoro (HR Baghowi)
Jamaah Jum’at ingkang minulyo hafidzokumulloh
Menikolah sekedik khutbah ingkang saged kaaturaken…
Sekedik khutbah ing
Jum’at meniko mugio saged paring
manfaat dumateng kulo panjenengan sami sak keluargo, lan sumrambah dumateng sedoyo
Ummat Islam Amin Ya Robbal ‘Alamin.
وَالْعَصْرِ
-١- إِنَّ الْإِنسَانَ لَفِي خُسْرٍ -٢- إِلَّا الَّذِينَ آمَنُوا وَعَمِلُوا الصَّالِحَاتِ
وَتَوَاصَوْا بِالْحَقِّ وَتَوَاصَوْا بِالصَّبْرِ -٣-
بارك
الله لي ولكم في القران العظيم ونفعني وإياكم بما
فيه من الأيات وذكر الحكيم وتقبل مني ومنكم
تلاوته إنه هو السميع العليم
0 komentar:
Posting Komentar